सिन्धुली । स्व. पत्रकार सुरेश रजकको नृशंस हत्याको विरोधमा नेपाल पत्रकार महासंघ सिन्धुलीका अध्यक्ष बाबुराम देवकोटाले अस्पतालको शैय्यामै कालोपट्टी बाँधेर विरोध जनाउनुभएको छ । पत्रकार तथा सञ्चारमाध्यममाथि भएको आक्रमणको घोर भत्र्सना गर्दै उहाँले सिन्धुली अस्पतालको शैय्यामा रहेर सरकारसँग न्यायको माग गर्नुभएको हो ।

अध्यक्ष देवकोटा स्वास्थ्य समस्याका कारण तीन दिनदेखि सिन्धुली अस्पतालमा उपचाररत हुनुहुन्छ । पत्रकार रजकको हत्या एक व्यक्तिमाथिको आक्रमण नभई पत्रकारिता क्षेत्रकै स्वतन्त्रतामाथि प्रहार भएको उहाँले बताउनुभयो । भन्नुभयो, “पत्रकारितामाथिको आक्रमण सह्य छैन । यो आक्रमण लोकतन्त्र र अभिव्यक्ति स्वतन्त्रतामाथिको गम्भीर प्रहार हो । पत्रकारिता क्षेत्रको सुरक्षाका लागि दोषीलाई कडा सजाय नदिएसम्म हाम्रो विरोधका कार्यक्रमहरु चलिरहनेछन् ।”

यसैबिच, सिन्धुलीका पत्रकारहरु आइतबार कालोपट्टी बाँधेर काममा खटिएका छन् । नेपाल पत्रकार महासंघ केन्द्रीय समितिको निर्णय र नेपाल पत्रकार महासंघ सिन्धुलीको समन्वयमा पत्रकारहरुले कालोपट्टी बाँधेर विरोध जनाएका हुन् । विहान नेपाल पत्रकार महासंघ सिन्धुलीको प्रांगणमा राजावादी आन्दोलनमा मारिएका पत्रकार रजकप्रति श्रद्धाञ्जली व्यक्तसमेत गरिएको छ । जिल्लामा क्रियाशिल पत्रकारहरुले स्वर्गिय पत्रकार रजकलाई आन्दोलनका नाममा हत्या गरिएको भन्दै घटनाको उचित छानविन र दोषीलाई कारवाहिको माग गरेका छन ।

नेपाल पत्रकार महासंघ बागमती प्रदेश उपाध्यक्ष बिमला पाण्डेले पत्रकार रजकको हत्या, पत्रकार दिनेश गौतममाथिको कुटपिट र सञ्चारमाध्यममाथि भएको तोडफोडमा संलग्नलाई कारवाहिको दायरामा ल्याउन माग गर्नुभयो । उहाँले क्षतिपूर्ति र पत्रकार तथा सञ्चारमाध्यमको उचित सुरक्षाको व्यवस्था गर्न पनि सरकारसँग आग्रह गर्नुभएको छ ।

स्व.रजकको हत्यापछि देशभरका पत्रकार महासंघ र संचारकर्मीहरूले विरोधका कार्यक्रमहरू गर्दै आएका छन् । दोषीलाई यथाशीघ्र कानुनी कठघरामा ल्याउन माग गर्दै विभिन्न जिल्लाहरूमा विरोध प्रदर्शन भइरहेको छ । नेपाल पत्रकार महासंघले सरकारलाई पत्रकारहरूको सुरक्षाका लागि प्रभावकारी नीति ल्याउन सरकारसँग माग गरेको छ ।