सिन्धुली । मदन भण्डारी लोकमार्गअन्तर्गत सिन्धुलीको दुधौली नगरपालिका–४, एकहटियामा मोटरसाइकल र ईभी गाडी ठोक्किँदा एक जनाको मृत्यु भएको छ । नौ जना घाइते भएका छन् ।

दुर्घटना बिहीबार बिहान ८ः२० बजे भएको हो । उदयपुरबाट काठमाडौं जाँदै गरेको बा–प्र ०३–०१–४४५ नम्बरको ईभी गाडी र डकाहाबाट दुधौलीतर्फ गइरहेको प्र २–००१–प ७०११ नम्बरको मोटरसाइकल एकआपसमा ठोक्किएको थियो ।

मोटरसाइकल र ईभी गाडी एकआपसमा ठोक्किँदा तीनपाटन गाउँपालिका–१० औलडाँडा बस्ने २६ वर्षिय प्रेम राना मगरको मृत्यु भएको जिल्ला प्रहरी कार्यालय, सिन्धुलीका प्रहरी नायव उपरिक्षक अनिल कुमार खड्काले जानकारी दिनुभयो । उहाँकाअनुसार गम्भिर घाईते बनेका राना मगरलाई उपचारका लागि स्थानीय नगर अस्पताल, सिर्थौली लगिएको थियो । उपचारका क्रममा मृत्यु भएपछि विहान ९ः५७ मा चिकित्सकले मृत घोषणा गरेका थिए । 

ईभीमा सवार नौजना यात्रुमध्ये केहीको अवस्था मध्यम र केही सामान्य रहेको छ । घाइतेहरूलाई केहीलाई काठमाडौस्थित ट्रमा सेन्टर र केही घाईतेहरुलाई सिर्थौली नगर अस्पतालमा उपचारका लागि राखिएको छ ।

प्रहरीले सामान्य घाइते ईभी चालक उदयपुर त्रियुगा नगरपालिका–६ बस्ने ३८ वर्षीय विरेन्द्र कुमरलाई नियन्त्रणमा लिएको छ । प्रहरी नायव उपरिक्षक खड्काअनुसार घटना बारेमा थप अनुसन्धान भइरहेको छ ।