काठमाडौँ । राष्ट्रपति रामचन्द्र पौडेलले संविधानले दिएको अधिकार प्रयोग गर्दा लोकतान्त्रिक संस्कृति र संस्कारलाई विर्सन नहुने स्पष्ट पार्नुभएको छ। उहाँले लोकतन्त्रमा जनताको अभिमत सबैभन्दा ठूलो हुने भन्दै संविधानको मर्म, भावना र व्यवस्था नेपाली जनतालाई स्वीकार्य हुने गरी पालना गर्नुपर्ने बताउनुभयो।

 

रेडियो नेपालको हीरक महोत्सवको उद्घाटन समारोहमा बोल्दै राष्ट्रपति पौडेलले संविधानले प्रत्येक नागरिकलाई असहमति राख्ने अधिकार प्रदान गरेको उल्लेख गर्दै यसको प्रयोग गर्दा जिम्मेवारी बोध आवश्यक हुने बताउनुभयो। उहाँले भन्नुभयो, “संविधानले दिएको हाम्रो अधिकार प्रयोग गर्दा लोकतान्त्रिक संस्कृति र संस्कारको पालना जरुरी छ। जनताको अभिमत सबैभन्दा ठूलो हो, त्यसलाई बेवास्ता गर्दा संविधानको मर्म विपरीत हुन्छ।’’

राष्ट्रपति पौडेलले स्वतन्त्रताका नाममा हिंसा, तोडफोड, आगजनी र लुटपाट सर्वदा निषेधित रहेको स्पष्ट पार्दै नागरिकलाई आफ्नो विचार अभिव्यक्त गर्ने स्वतन्त्रता भए पनि त्यसको दुरुपयोग गर्नु अस्वीकार्य हुने बताउनुभयो। उहाँले हालै काठमाडौँमा भएको घटनाका क्रममा जनधनको क्षतिप्रति दुःख व्यक्त गर्दै सञ्चार जगतलाई जिम्मेवार भई सत्य, तथ्य र निष्पक्ष समाचार सम्प्रेषण गर्न आग्रह गर्नुभयो।

 

उहाँले रेडियो नेपालको ऐतिहासिक योगदानको प्रशंसा गर्दै लोकतान्त्रिक आन्दोलनमा पत्रकारिता क्षेत्रको महत्त्वपूर्ण भूमिका रहेको स्मरण गराउनुभयो। रेडियो नेपालले लोकतन्त्र स्थापनापछि आमसञ्चार माध्यमको विकासमा टेवा पुर्‍याएको उल्लेख गर्दै सूचनाको हक प्रत्याभूत गर्न यसको भूमिकालाई अझ प्रभावकारी बनाउनुपर्नेमा जोड दिनुभयो।

 

राष्ट्रपति पौडेलले प्रविधिको विकाससँगै नागरिक पत्रकारिता सबल बन्दै गएको चर्चा गर्दै सामाजिक सञ्जालमार्फत गलत सूचना सम्प्रेषणले समाजलाई दिग्भ्रमित पार्न सक्ने खतरा रहेको औंल्याउनुभयो। उहाँले जिम्मेवार सञ्चारमाध्यमले सत्यतथ्य सूचनामार्फत जनतालाई सुसूचित गर्नु आफ्नो दायित्व भएको बताउनुभयो।

 

नेपालको लोकतान्त्रिक इतिहासमा रेडियो नेपालले खेलेको भूमिकालाई स्मरण गर्दै राष्ट्रपति पौडेलले संस्थापक तारिणीप्रसाद कोइरालाको योगदानको प्रशंसा गर्नुभयो। उहाँले रेडियो नेपाल सार्वजनिक सेवा प्रसारण संस्थामा रूपान्तरण हुनु सकारात्मक भए पनि यसको प्रभावकारी कार्यान्वयन चुनौतीपूर्ण रहेको बताउँदै निष्पक्ष पत्रकारिता कायम राख्न आग्रह गर्नुभयो।