सिन्धुली । ६८औं राष्ट्रिय सहकारी दिवस “मर्यादित सहकारीः समुन्नत समाज” भन्ने मुल नाराका साथ विभिन्न कार्यक्रम गरी मनाइएको छ । सिन्धुली अस्पतालका विरामीहरुलाई फलफूल वितरण, प्रभात र्याली, रक्तदान, सहकारी शिक्षा, कर संवाद, सहकारी संस्थाको भावी चुनौतीबारे छलफल लगायतका कार्यक्रम आयोजना गरेर मनाइएको हो ।

१७ चैत्रदेखि निरन्तर रुपमा विविध कार्यक्रम सञ्चालन गरिएका थिए । बुधबार सिन्धुलीमाढीमा आयोजित प्रभात र्याली तथा विरामीलाई फलफूल वितरण कार्यक्रमलाई सम्बोधन गर्नुहुँदै कमलामाई नगरपालिका, सिन्धुलीका प्रमुख उपेन्द्र कुमार पोखरेलले सहकारी संस्था आर्थिक तथा सामाजिक रुपान्तरणका प्रमुख आधारशिला भएको धारणा राख्नुभयो । सहकारीको मर्यादा कायम गर्दै अघि बढ्न सके मात्र समुन्नत समाज निर्माण गर्न सकिने उहाँको भनाई थियो ।

 

दिवस विशेष कार्यक्रमहरु कमलामाई नगरपालिका, करदाता सेवा कार्यालय, राष्ट्रिय सहकारी बैंक, जिल्ला सहकारी संघ, सिन्धुली बचत तथा ऋण सहकारी संघ, सिन्धु साकोस, स्वर्णिम भविष्य बचत तथा ऋण सहकारी संघ, नेपाल बचत तथा ऋण केन्द्रिय सहकारी संघ (नेफ्स्कून)लगायत अन्य सहकारी संस्थाहरुको संयोजन, समन्वय र सहकार्यमा सम्पन्न भएको हो । 

 

दिवस विशेष कार्यक्रम साँझ दीप प्रज्वलन गरेर समापन गरिएको थियो । कर्यक्रममा जिल्लाका सहकारीकर्मीहरुको उल्लेखनीय उपस्थिति रहेको थियो ।