सिन्धुली । कमलामाई नगरपालिका, सिन्धुलीले आफ्नो २८औं स्थापना दिवस विविध कार्यक्रम गरेर मनाएको छ । वि.सं.२०५३ चैत १४ मा नगरपालिका स्थापना गरिएको थियो । त्यसको स्मरणमा बिहिबार एक विशेष समारोहको आयोजना गरेर स्थापना दिवस भव्य रुपमा मनाईएको हो । 

समारोहका अध्यक्ष तथा नगरप्रमुख उपेन्द्र कुमार पोखरेलले आफ्नो कार्यकालमा नगरले आर्थिक, सामाजिक तथा भौतिक पूर्वाधारको क्षेत्रमा हासिल गरेका उपलब्धिहरूको चर्चा गर्दै आगामी दिनहरूमा अझ प्रभावकारी सेवा प्रदान गर्ने प्रतिवद्धता व्यक्त गर्नुभयो ।  

नगरपालिकाले निजी क्षेत्रसँग सहकार्य गर्दै कृषि, पर्यटन प्रवद्र्धन र पूर्वाधार निर्माणमा लगानी बढाउने लक्ष्य राखेको उहाँको भनाई थियो । दुग्ध उत्पादनमा नगर आत्मनिर्भर भएको उल्लेख गर्दै स्थानीय उत्पादनलाई व्यवसायिक विस्तार गर्ने योजना रहेको सुनाउनुभयो । नगरले आगामी वर्षहरूमा नगरबासीहरुको आवश्यकताअनुसार थप कार्यक्रम सञ्चालन गर्ने जानकारीसमेत गराउनुभयो ।

समारोहलाई सम्बोधन गर्दै प्रमुख जिल्ला अधिकारी लीला प्रसाद शर्माले कनपाले शिक्षा, स्वास्थ्य, पूर्वाधार विकास र सुशासनका क्षेत्रमा गरेको कार्य सन्तोषजनक पाइएको बताउनुभयो । पालिका–पालिकाबिच साझेदारी गरेर विकासका कार्य अगाडी बडाउनु पर्नेमा जोड दिँदै नागरिकहरूको समृद्धि नै सरकारको प्राथमिकता रहेको उल्लेख गर्नुभयो । 

स्थापना दिवसको अवसरमा नगर उपप्रमुख मञ्जु देवकोटाले आफुहरु समृद्ध नगर, खुशी नगरबासी बनाउन जुटिरहेको बताउनुभयो । विकासलाई प्राथमिकता दिँदै नगरबासीहरूको जीवनस्तर उकास्ने नगरका योजनाहरु रहेको जानकारी दिनुभयो । 
सिन्धुली उद्योग वाणिज्य संघ कमलामाई नगरपालिकाको विकासका लागि हातेमालो गर्न तयार रहेको वाणिज्य उपाध्यक्ष नविन श्रेष्ठले बताउनुभयो । “आगामी दिनमा  नगर क्षेत्रमा एउटा घण्टाघर स्थापना गर्ने, फोहोर व्यवस्थापन लगायत अरु धेरै क्षेत्रमा हामी नगरसँग सहकार्य गर्न तयार छौँ,” उहाँले भन्नुभयो । 

समारोहमा नगरपालिकाको २८ वर्षे यात्रा, उपलब्धिहरू तथा भावी योजनाहरूको समीक्षा गरिएको थियो । नगरका कर्मचारी र जनप्रतिनिधिहरुले समृद्ध नगर निर्माणमा एकजुट भएर आवश्यक कार्य अगाडी बढाउने प्रतिबद्धता जाहेर गरेको थिए ।

स्थापना दिवस विशेष समारोहमा कर्मचारी तथा जनप्रतिनिधिहरुले विभिन्न प्रस्तुति दिएर कार्यक्रमका सहभागीहरुलाई मनोरञ्जनसमेत प्रदान गरेका थिए । यसका साथै, कमलामाई नगरपालिकाले २८ औँ स्थापना दिवसको अवसरमा सरसफाई र खेलकुदका विभिन्न कार्यक्रमहरु संचालन गरेको थियो । 

स्थापना दिवसको अवसरमा आयोजित ब्याडमिन्टन प्रतियोगिता, भलिबल, चम्चा दौड, म्युजिकल चियर, विंगो खेल, हाडी फुटाउने लगायतका खेलका विजेताहरुलाई नगदसहित, ट्रफी र प्रमाणपत्रले पुरस्कृतसमेत गरिएको थियो ।

नगरका प्रमुख प्रशासकीय अधिकृत विनोद भट्राईले मन्तव्य मार्फत स्वागत गर्नुको कार्यक्रममा स्थानीय जनप्रतिनिधि, समाजसेवी, पत्रकार, नगरबासीलगायत विभिन्न सरकारी–गैरसरकारी कार्यालयका प्रमुख तथा प्रतिनिधिहरुको उपस्थिति रहेको थियो ।

४८२.५७ वर्ग कि.मी.क्षेत्रफलमा फैलिएको कमलामाई नगरपालिका चुरे तराईको प्रचण्ड गर्मीदेखी महाभारतको उच्च श्रृङ्खलासम्म विस्तारित भएको छ ।