सिन्धुलीमा खेलकुद महोत्सव सम्पन्न, कमलामाई नगरपालिकालाई पहिलो उपाधि


सिन्धुली । ‘स्वास्थ्यका लागि खेलकुद, राष्ट्रका लागि खेलकुद’ भन्ने नाराका साथ सिन्धुलीमा आयोजित प्रथम जिल्ला स्तरीय खेलकुद महोत्सव–२०८१ म्ांगलबार सम्पन्न भएको छ । जिल्लाका नौवटा पालिका सहभागी खेलकुद महोत्सवमा कमलामाई नगरपालिका  ३० स्वर्ण, १२ रजत र ४ कास्यपदक जित्दै पहिलो उपाधि हासिल गर्न सफल भयो । यो सँगै नगर प्रमुख उपेन्द्र कुमार पोखरेलले प्रतियोगीहरुलाई धन्यपाद तथा बधाई व्यक्त गर्नुभयो । नगरका खेलाडीहरुसँगै उहाँले खुशी साटासाट समेत गर्नुभयो । 


त्यस्तै, तीनपाटन गाउँपालिका ६ स्वर्ण, ५ रजत, ३ कास्यपदकसहित दोस्रो स्थान, हरिहरपुरगढी गाउँपालिका ६ स्वर्ण, ३ रजत, ९ कास्यपदकसहित तेस्रो स्थान प्राप्त गर्न सफल भएको हो । फागुन ५ गतेदेखि सुरु भएको राष्ट्रपति रनिङ शिल्ड प्रतियोगिता ७ गते सम्पन्न भएलगत्तै, फागुन ८ गतेदेखि १३ गतेसम्म प्रथम जिल्ला स्तरीय खेलकुद महोत्सव सञ्चालन गरिएको थियो ।


जिल्ला खेलकुद विकास समिति सिन्धुलीको आयोजनामा सम्पन्न खेलकुद महोत्सवमा एक हजार तीन सय ३३ जना खेलाडीहरू विभिन्न खेलका विधामा प्रतिस्पर्धा गर्न सहभागी भएका थिए । खेलकुद महोत्सव समापन समारोहमा विजेता तथा उपविजेता खेलाडीहरूलाई शिल्ड, मेडल, ट्रफी र प्रमाणपत्र प्रदान गरिएको थियो । साथै, प्रतियोगिता सफल बनाउन योगदान पुर्याउने विभिन्न संघसंस्थाहरू, खेलकुदस्थलमा खटिएका स्वयंसेवकहरू, प्रशिक्षकहरू तथा सञ्चारकर्मीहरूलाई कदरपत्रसहित सम्मान गरिएको थियो ।


सिन्धुलीमा पहिलो पटक गरिएकोे खेलकुद प्रतियोगिताले स्थानीय खेलाडीहरूलाई आत्मविश्वास प्रदान गर्नुका साथै प्रतिस्पर्धात्मक क्षमताको अभिवृद्धि गरेको आयोजकको भनाइ छ । खेलकुद समापन समारोहमा संघिय सांसद लेखनाथ दाहाल (राजन) ले स्थानीय, प्रदेश र संघीय सरकारको समन्वयमा खेलकुद प्रवद्र्धनको आवश्यकता औंल्याउँदै, खेलाडीहरूलाई राष्ट्रिय तथा अन्तर्राष्ट्रिय स्तरमा प्रतिस्पर्धा गर्ने अवसर प्रदान गर्न बजेट सुनिश्चित गरिने प्रतिबद्धता जनाउनुभयो । उहाँले भन्नुभयो, “स्थानीय खेलाडीलाई राष्ट्रिय र अन्तर्राष्ट्रिय स्तरमा प्रतिस्पर्धा गर्ने अवसर प्रदान गर्न हामी सबैले सहकार्य गर्नुपर्छ । खेलकुद महोत्सवलाई हरेक वर्ष निरन्तरता दिन आवश्यक छ ।”


सिन्धुलीमा खेलकुदको विकास र प्रवद्र्धनका लागि यस्ता प्रतियोगिताहरूलाई निरन्तरता दिनुपर्ने उहाँको भनाई थियो । 

प्रतिकृया दिनुहोस