सिन्धुली । बागमती प्रदेश सरकारका युवा तथा खेलकुद मन्त्री मीनकृष्ण महर्जनले खेलकुद क्षेत्रको विकासलाई प्राथमिकतामा राखेको बताउनु भएको छ । सोमबारदेखि सिन्धुलीमाडीमा सुरु भएको १३ औँ राष्ट्रपति रनिङ शिल्ड तथा प्रथम सिन्धुली जिल्ला स्तरीय खेलकुद महोत्सव–२०८१ को उद्घाटन गदैँ उहाँले बागमती प्रदेशलाई खेलकुदको हबका रुपमा विकास गर्ने बताउनु भएको हो । 

उहाँले प्रदेशभित्र खेलकुदका लागि आवश्यक संरचनाको विकास, खेलाडीहरुको पहिचान र प्रशिक्षणलाई प्राथमिकतामा राखेर आफ्नो मन्त्रालयले काम गरिरहेको उल्लेख गर्नुभयो । ४० वर्षदेखि खेलकुद क्षेत्रमा क्रियाशील रहेको सुनाउँदै मन्त्री महर्जनले खेलाडीहरुको भविष्य सुनिश्चित गर्न तीनै तहका सरकारसँग पहल गरिरहेको बताउनुभयो । भन्नुभयो, “जहाँ गए पनि म पहिला खेलाडीहरुलाई खोज्छु, किनभने राष्ट्रको पहिचान जगाउने खेलाडीहरु नै हुन् ।” 

 बागमती प्रदेशका सासंद क्षेत्रबहादुर बम्जनले जिल्ला स्तरीय खेल खेलाउन सिन्धुलीमा खेल मैदानको अभाव रहेकोले व्यवस्थित खेल खेल्ने ठाउँ बनाउन मन्त्री महर्जनलाई बजेटको व्यवस्था मिलाई दिनुहुन आग्रह गर्नुभयो । जिल्ला समन्वय समिति सिन्धुलीका प्रमुख कारसाङ लामा लगायतका वक्ताहरुले खेल महोत्सव भव्य र सभ्यताका साथ सम्पन्न हुने अपेक्षा गदैँ खेलकुद सफलताको शुभकामना व्यक्त गरेका थिए । 

सिन्धुली जिल्ला खेलकुद विकास, समितिकोे आयोजना तथा जिल्ला समन्वय समितिको समन्वयमा आजदेखि सुरु भएको खेल महोत्सव फागुन १३ गतेसम्म सञ्चालन हुने छ । खेल महोत्सवमा भलिवल, फुटबल, क्रिकेट, ब्याडमिन्टन, कबड्डी, कराँते, तेक्वान्दो, म्याराथन र बक्सिङ गरी १० प्रकारका खेलहरु समावेश गरिएका छन् । जिल्लाका ९ वटै स्थानीय तहका एक हजार तीन सय ३३ जना खेलाडीहरुले विभिन्न खेल प्रतियोगितामा भाग लिएका आयोजक संस्थाका अध्यक्ष वीर बहादुर थिङ तामाङ (विशाल) ले जानकारी दिनुभयो । 

प्रतियोगिताका विजेता खेलाडीहरुलाई शिल्ड, मेडल, प्रमाणपत्र तथा विधागत पुरस्कार प्रदान गरिने छ । साथै खेल क्षेत्रमा विशेष योगदान दिने खेलाडीहरुलाई सम्मान गर्ने समेत कार्यक्रम छ ।  महोत्सव सञ्चालन गर्न ४१ लाख रुपैयाँ खर्च लाग्ने अनुमान गरिएको छ । उक्त बजेट स्थानीय तह, संघसंस्था तथा विभिन्न सहयोगी निकायहरूको सहयोग र सहकार्यमा व्यवस्थापन भइरहेको आयोजकले जनाएको छ । 

स्वास्थ्यका लागि खेलकुद, राष्ट्रका लागि खेलकुद भन्ने मुख्य नाराका साथ सुरु भएको खेलकुद महोत्सवले जिल्लाको खेल क्षेत्रमा लगानी अभिवृद्धि गर्नुका साथै खेलाडी टिकाउने वातावरण सिर्जना गर्ने विश्वास गरिएको छ ।