सिन्धुली । नेपाल कम्युनिष्ट पार्टी (माओवादी केन्द्र)का अध्यक्ष तथा पूर्वप्रधानमन्त्री पुष्पकमल दाहाल (प्रचण्ड) ले ज्ञानेन्द्र शाहलाई छाडा छोड्न नहुने बताउनु भएको छ । आइतबार माओवादी केन्द्र दुधौली नगर समितिको दोस्रो नगर सम्मेलनलाई सम्बोधन गर्दै उहाँले सामन्ती प्रवृत्तिहरूले पुनः टाउको उठाउन खोजेको उल्लेख गदैँ सचेत रहनुपर्ने बताउनुभयो ।

भन्नुभयो, “ज्ञानेन्द्र शाहलाई छाडा छोड्न सकिदैन । जनता र पार्टीहरुले देखाएको उदारताको नाजायज फाईदा उठाएर फेरी गुण्डागर्दी, हत्या, आततायी काम गर्छन्भने् उनलाई छुट दिइदैन् । उनलार्ई छुट दिनु हुँदैन भनेर अहिले जनस्तरबाटै आवाज उठेको छ ।”

माओवादी केन्द्रले राष्ट्रिय एकता कायम गर्न लागेका बेला सामन्ती प्रतिगमनकारी तत्वहरुले टाउको उठाउने जमर्को गरेको उहाँको भनाई थियो । कुकुरको पुच्छर बाह्र वर्ष ढुंग्रोमा राखेपनि जस्ताको त्यस्तै भनेजस्तै ज्ञानेन्द्र शाह नसुध्रिएको उहाँले टिप्पणी गर्नुभयो ।
संघिय लोकतान्त्रिक गणतन्त्रको मुख्य नेतृत्वकर्ता आफ्नो पार्टी हुनुको नाताले र शान्ति सम्झौताको जिवित हस्ताक्षरकर्ता हुनुको नाताले नेपाली नागरिकले प्राप्त गरेको अधिकारीलाई अझ व्यवस्थित तरीकाले अगाडी बढाउने उद्देश्यका साथ प्रतिगमनकारी सड्यन्त्रका विरुद्ध काठमाडौमा विशाल जनसभासमेत गरिएको उहाँले बताउनुभयो । 

प्रचण्डले तीनकुनेमा आयोजित राजावादीहरूको सभालाई विवेकहीनता, आततायी प्रवृत्ति र हत्याको संज्ञा दिनुभयो । उहाँले चैत १५ गते काठमाडौमा भएको गणतन्त्र पक्षधरहरूको सभा संयमित तर कथिन राजावादीहरूको सभा हत्याराका रूपमा चित्रित गर्नुभयो । ती सभा हिरो र भिलेनको जस्तो भएको उहाँको टिप्पणी थियो ।  “समाजवादी मोर्चाको सभा नभएको भए त्यस दिन अझ ठूलो बितण्डा राजावादी मण्डलेहरूले गर्न सक्ने भनेर काठमाडौंका जनताले हामीलाई धन्यवाद दिए,’ उहाँले सुनाउनुभयो ।

राजावादीहरुको आन्दोलनका क्रममा दुई युवाको हत्या हुनुको जिम्मेवार ज्ञानेन्द्र शाह रहेको आरोप लगाउँदै उहाँले जनताले अब यस्ता प्रवृत्तिलाई सहन नसक्ने चेतावनी दिनुभयो ।  “दुई युवाको हत्या भयो, यसको जिम्मेवार ज्ञानेन्द्र शाह नै हो । आफ्नै घरमा त्यत्त्रो भयानक हत्या काण्ड मञ्चन गर्न सक्नेहरुले जनताका छोराछोरीलाई मार्ने कुरालाई केही जस्तो नै मान्दैनन्,” उहाँले भन्नुभयो । 

प्रचण्डले संघीय लोकतन्त्रलाई अझ व्यवस्थित बनाउन आवश्यक रहेको बताउनुभयो । लोकतन्त्र ल्याउन सबै वर्ग, समुदायका छोराछोरीको बलिदान रहेको स्मरण गर्दै उहाँले यसको रक्षा गर्ने जिम्मेवारी रहेको चर्चा गर्नुभयो ।

जनताले चाहेजस्तो काम अझै नभएको चर्चा गदै संघिय लोकतन्त्रलाई झै व्यवस्थित बनाउन आवश्यक रहेको उहाँले बताउनुभयो । माओवादी केन्द्रले आत्मसमीक्षा गर्दै जनताको बिचमा जाने निर्णय गरेको र संघीय लोकतान्त्रिक गणतन्त्रको संरक्षण तथा सुदृढीकरणको अभियानमा रहेको स्पष्ट पार्नुभयो । 

 पछिल्लो समय विचार, वर्गीय संघर्ष, बेपत्ता सहिद तथा किसानहरूसँगको सम्बन्ध केही कमजोर भएको भन्दै त्यसलाई पुनः बलियो बनाउन माओवादी केन्द्र प्रतिबद्ध भएर अगाडी बढेको उहाँको भनाई थियो ।

उहाँले माओवादी केन्द्रको नेतृत्वमा रहेका १२३ स्थानीय तहलाई नमुना बनाउन आवश्यक योजना अघि बढाइएको जानकारी दिनुभयो । साथै, दुई राष्ट्रिय अभियान – ’तराई मधेस जागरण अभियान’ र ’मध्यपहाडी लोकमार्गलाई केन्द्र बनाएर हिमाल र पहाड जोड्ने अभियान’ सञ्चालन गरिने पार्टीको निर्णय भएको बताउनुभयो । 

प्रचण्डले सिन्धुलीलाई क्रान्तिकारी किल्ला तथा उत्पादन, उत्पादकत्व, विकास निर्माण र समृद्धिको आधारभूमि भएको उल्लेख गर्नुभयो । उहाँले माओवादी केन्द्रमा जनताको विश्वास बढ्दै गएको दाबीसमेत गर्नुभयो । उहाँले आगामी दिनमा देशको नेतृत्व जनताको बलमा माओवादीले लिने विश्वास व्यक्त गर्दै भ्रष्टाचारलाई सम्पूर्ण रूपमा उन्मूलन गर्न माओवादी केन्द्र लागिपर्ने प्रतिवद्धता व्यक्त गर्नुभयो । 

वर्तमान सरकार भ्रष्टाचारीको रक्षाका लागि बनेकाले जनतामा निराशा छाएको उहाँको आरोप थियो ।