सिन्धुली । नेपाली कांग्रेसका महामन्त्री गगन कुमार थापालाई सिन्धुलीमा भव्य स्वागत गरिएको छ । शनिबार नेपाली कांग्रेस प्रतिनिधि सभा क्षेत्र नं. १ सिन्धुलीको प्रथम क्षेत्रीय सम्मेलनलाई सम्बोधन गर्न आउँदा स्थानीय नेता, कार्यकर्ता र समर्थकहरूले भव्य स्वागत गरेका हुन् ।

महामन्त्री थापा कार्यक्रम स्थल नपुग्दै कांग्रेस कार्यकर्ताहरूको उत्साहजनक उपस्थितिले माहोल उल्लासमय बनाएको थियो । स्थानीय नेताहरूले फूलमाला, अबिर र खादा अर्पण गर्दै उहाँलाई स्वागत गरेका थिए । सिन्धुलीमाडी प्रवेश गर्नुअघि नै नेपाल तरुण दल, नेपाल विद्यार्थी संघलगायत युवा नेता तथा कार्यकर्ताहरुले गाडी, मोटरसाइकल र्यालीसहित उहाँलाई कार्यक्रमस्थल पुर्याएका थिए ।

सयौँ नागरिकहरुको उल्लासमय सहभागिता रहेको सम्मेलनलाई सम्बोधन गर्दै महामन्त्री थापाले सरकारको संरचनागत सुधार, संघीयता सुदृढीकरण, प्रदेशलाई थप अधिकार प्रत्यायोजन, तथा सरकारी निकायहरूको पुनर्संरचना आवश्यक रहेको धारणा राख्नुभएको थियो । उहाँले वर्तमान सरकारको आलोचना गर्दै कुलमान घिसिङ प्रकरणमा सरकार अनावश्यक किचकिचमा लागेको बताउँदै समग्र रूपमा प्रभावकारी सरकार निर्माणको आवश्यकता औंल्याउनुभयो ।

जिल्लामा महामन्त्री थापाको आगमनले कांग्रेस कार्यकर्ताहरूमा नयाँ जोश र उत्साह थपिएको स्थानीय नेताहरूले बताएका छन् ।