सिन्धुली । नेपाली सेनाले सिन्धुलीको ऐतिहासिकस्थल हरिहरपुरगढीदेखि सिन्धुलीगढीसम्मको एकिकरण मार्गमा पदयात्रा सुरु गरेको छ । श्री भवानीबक्स गण र हरिहरपुरगढी गाउँपालिकाको समन्वय तथा सहकार्यमा बुधबार पदयात्रा सुरु भएको हो । 

पदयात्राको उद्देश्य नेपाल एकिकरणका क्रममा प्रयोग भएका ऐतिहासिक गढी, किल्ला तथा पदमार्गहरुको संरक्षण, पर्यटन प्रवद्र्धन, प्रचार–प्रचार र पुर्खाको सम्मान गर्ने रहेको छ । हरिहरपुगढी गाउँपालिका–१ स्थित हरिहरपुरगढी किल्लादेखि कमलामालाई नगरपालिका–३ स्थित सिन्धुलीगढीसम्म ७५ किलोमिटर दूरीको पदयात्रा आठ दिनमा सम्पन्न हुने छ । 

भवानीबक्स गणका सेनानी गणेश सागर हमालको नेतृत्वमा पदयात्रामा निस्किएका ४५ जनाको टोलीलाई हरिहरपुरगढी गाउँपालिका अध्यक्ष बज्रध्वज वाईवा, श्री नं. ९ बाहिनी अड्डाका बाहिनीपति सहायक रथी युवराज कार्की, भवानीबक्स गणका गणपति प्रमुख सेनानी बद्री कुँवरले राष्ट्रिय झण्डा प्रदान गरेर भव्यताका साथ विदाई गरेका थिए । 

पदयात्रा शुभारम्भ कार्यक्रमलाई सम्बोधन गर्नुहुँदै हरिहरपुरगढी गाउँपालिका प्रमुख बज्रध्वज वाईवाले ऐतिहासिकस्थलहरुको संरक्षण, पर्यटन प्रवद्र्धन तथा विकासका लागि यस्ता पदयात्राहरुले सहयोग पुग्ने बताउनुभयो । स्थानीय समुदाय र सरोकारवालाहरुको सहकार्यमा हरिहरपुरगढी किल्ला क्षेत्रलाई पर्यटकीय गन्तव्यका रुपमा विकास गर्न लागिएको उहाँले सुनाउनुभयो । 

सिन्धुलीका इतिहास जानकार तथा अनुसन्धानकर्ता सागरकुमार ढकालले नेपाली सेना र पालिकाको सहकार्यमा सुरु भएको पदयात्राले इतिहासलाई सम्मान गरेको बताउनुभयो । भन्नुभयो, “इतिहासलाई सम्मान गर्नु भनेको सबै भन्दा ठूलो विकास हो ।”

प्रमुख जिल्ला अधिकारी लीला प्रसाद शर्माले इतिहास, धर्म, संस्कृति, परम्पराको संरक्षण नभए देश समृद्ध बन्न कठिन हुने धारणा राख्नुभयो । नयाँ निर्माण र पुरानाको संरक्षणले मात्रै देश समृद्ध बन्ने उहाँको भनाई थियो । हरिहरपुरगढी गाउँपालिका–१ का वडाध्यक्ष जित बहादुर थिङले ओझेलमा परेको ऐतिहासिकस्थल हरिहरपुरगढी किल्लाले अब मुहार फेर्ने विश्वास व्यक्त गर्नुभयो । गाउँपालिका र नेपाली सेनाको समन्वय तथा सहकार्यमा गढी किल्लाको संरक्षण र पर्यटन प्रवद्र्धनका लागि भएको प्रयासले आर्थिक विकासमा समेत टेवा पुग्ने उहाँको बुझाई थियो ।   

 पदयात्राको समापन फागुन १४ गते महाशिवरात्रि तथा सेना दिवसको अवसरमा कमलामाई नगरपालिका–३ स्थित ऐतिहासिकस्थल सिन्धुलीगढीमा विशेष कार्यक्रम आयोजना गरेर समापन गरिने भवानीबक्स गणको योजना  छ । हरिहरपुरगढी किल्लाबाट हिडेको सेनाको टोली जितपुर भिमगड, सेपाह, मरिणको चन्दनपुर, फापरचुली, सुनकोशी गाउँपालिकाको बन्दीपुर, मतानबास, नागीहुँदै सिन्धुलीगढी पुग्नेछन् ।