काठमाडौं । आज हुने नेकपा एमालेको जागरण सभा बिहान ११ बजेबाट सुरु हुँदैछ । शुक्रबार बिहान ११ बजेबाट अराजकताविरुद्ध गर्न लागिएको जागरण सभामा १ लाख नागरिक उत्रिने जनाइएको छ ।

एमाले काठमाडौं, भक्तपुर र ललितपुरले आयोजना गर्ने जागरण सभाले समाजमा फैलिएको नकारात्मक दृष्टिकोणलाई सकारात्मक दिशातर्फ लैजाने, राष्ट्रिय सद्भाव कायम गर्ने र समाजलाई सही दिशातर्फ लैजानको लागि सहयोग पुग्ने बताएको छ ।

एमाले काठमाडौँ अध्यक्ष दीपक निरौलाले बिहान ११ बजे भद्रकालीबाट ¥याली सुरु भएर दरबारमार्ग पुगेर सभामा परिणत हुने जानकारी दिनुभयो । ‘सभालाई पार्टी अध्यक्ष केपी शर्मा ओलीलगायतले सम्बोधन गर्नुहुने छ, हामीले १ लाख मान्छेको उपस्थितिमा कार्यक्रम सम्पन्न गर्ने लक्ष राखेका छौं, उहाँले भन्नुभयो ।

नेपाली समाजमा फैलाइएको सामाजिक अराजकतालाई चिर्न कार्यक्रम आयोजना गरिएको उहाँले बताउनुभयो । निरौलाले एमाले माथि फैलाइएको भ्रम, सरकार र एमाले अध्यक्ष  ओलीलाई लगाइएका निराधार आरोप र लाञ्छना कार्यक्रमले चिर्ने उहाँको भनाई छ ।