सिन्धुली । ११५औं अन्तर्राष्ट्रिय महिला दिवस सिन्धुलीमा विविध कार्यक्रमसहित भव्य रूपमा मनाइएको छ । महिलाको हक, अधिकार, समानता, र सशक्तिकरणलाई प्रवद्र्धन गर्ने उद्देश्यले विभिन्न संघ–संस्थाहरू, स्थानीय तह, तथा महिला समूहहरूको संयुक्त आयोजनामा कार्यक्रम भएको हो ।

दिवसको अवसरमा बिहान जिल्लाका नौ वटै पालिकामा प्रभातफेरी निकालिएको थियो । जसमा स्थानीय समुदायका महिला, अधिकारकर्मी, सरकारी प्रतिनिधिहरू र सञ्चारकर्मीहरु उत्साहजनक सहभागिता थियो । प्रभातफेरीपछि आयोजित औपचारिक कार्यक्रममा महिलाको अधिकार, आत्मनिर्भरता, तथा लैंगिक समानताको विषयमा छलफल गरिएको सम्बन्धित पालिकाका प्रतिनिधिहरुले जानकारी दिएका छन् । 

कमलामाई नगरपालिका, सिन्धुलीको आयोजनामा आयोजित दिवस विशेष कार्यक्रममा प्रमुख जिल्ला अधिकारी लीला प्रसाद शर्माले महिला सशक्तिकरणका लागि सरकारले विभिन्न नीति तथा कार्यक्रमहरू ल्याएको जानकारी गराउँदै महिलाहरूले अवसरको सही उपयोग गर्नुपर्नेमा जोड दिनुभयो । त्यस्तै, स्थानीय महिला नेतृहरूले आर्थिक, सामाजिक, तथा राजनीतिक क्षेत्रमा महिलाको सहभागिता अझै बढाउन आवश्यक रहेको धारणा राखेका थिए ।

 

कार्यक्रमका अधिंकाश वक्ताहरुले महिला उद्यमशीलता, लैंगिक हिंसा न्यूनिकरण, तथा महिला सशक्तिकरणमा भएका उपलब्धिहरू, चुनौती र अवसरका बारेमा आ–आफ्नो विचार राखेका थिए ।